ഓക്സിജൻ
എഴുപതാം സ്വാതന്ത്ര്യ ദിനാരവങ്ങൾക്കപ്പുറം-
എഴുപത് കുരുന്നുകളാർത്തു വിളിക്കുന്നൂ…!
കുഞ്ഞുങ്ങളെ,
നിങ്ങളുടെ ജീവശ്വാസത്തിനായുള്ള തേട്ടം -
ഞങ്ങളുടെ കണ്ണുകൾ കടമെടുക്കുന്നൂ!
നിങ്ങളുടെ ഉറ്റവരുയിർക്കും തേങ്ങലുകളിൽ…
ചെങ്കോട്ടയിലെ വാദ്യങ്ങൾ മുങ്ങുന്നൂ.
സ്വാതന്ത്ര്യത്തിൻ പുലരിയെ -
നൊമ്പരക്കോടകൾ മായ്ക്കുന്നു…!
കഞ്ഞുങ്ങളെ,
ഒരു നുള്ളു ശ്വാസത്തിനായ് നിങ്ങൾ കേഴുമ്പോൾ….
യോഗാലയങ്ങളുടെ നാഡികളിൽ -
ജീവവായു നിറയുന്നൂ!
ഗോശാലകളിൽ ഓക്സിജൻ വിസ്ഫോടനം !!
മസ്തിഷ്കജ്വരം പത്തിവിടർത്തുന്നൂ !!!
കുഞ്ഞുങ്ങളെ, മാപ്പ്!
നിങ്ങളുടെ മലക്കം മറിഞ്ഞ കണ്ണുകൾ,
ചേതനയറ്റയുടലുകൾ….
തേങ്ങലടങ്ങാത്ത രോദനങ്ങൾ..
ചെങ്കോട്ടയിൽ അധികാരം കഴലൂതുമ്പോൾ..
പാരതന്ത്ര്യത്തെ അടയാളപ്പെടുത്തുന്നൂ…!
കുഞ്ഞുങ്ങളെ, മാപ്പ്!
മാപ്പുസാക്ഷികളോട് മാപ്പ്! മാപ്പ്!!
ഫാറൂഖ്- ഇ- മുഹമ്മദ്
14/8/2017